Тур 17. Белшына (Бабруйск) — Старт (Ворша). Прадмова

ПЕРАД СУСТРЭЧАЙ

Бабруйчане напярэдадні прайшлі ў ¼ Кубку Беларусі. Каманда на 5-м месцы, і цяпер можа больш пільна прыняцца за выкананьне задачы, якой, безумоўна, ёсьць вяртаньне ў Вышнюю лігу. У каманды 27 пунктаў. У «Старту» 25, і гульня ў Бабруйску вялікае выпрабаваньне для дружыны Кітаёва. На здольнасьць змагацца на розных з расьпісаным фаварытам.

Перад гульнёй мы хваляваліся за Дзьмітрыя Тамэлу, які ўсё ж разарваў пагадненьне з «Нафтанам» і падпісаў паўнавартасны кантракт са «Стартам». Спадзяёмся на вяртаньне на поле Глеба Жалезьнікава. Верхавод нашых атак днямі ажаніўся, а 31 ліпеня сьвяткуе дзень нараджэньня. Раней Глеб выступаў у Бабруйску, так што гэта знаёмая яму каманда.

Важнай гульні прысьвечана і афіша нашага мастака.

ІМГНЕНЬНЕ ГІСТОРЫІ

Гульня ў Бабруйску 45 гадоў таму, у 1979-м, скончылася нулявой нічыёй. Гэта было ў стыкавых гульнях за 13-е месца. А ў Воршы тады згулялі 1:1, таму бабруйчане згодна з правілам гасьцявога голу апынуліся вышэй.

ЯК БЫЛО?

Каманды Воршы і Бабруйску маюць амаль стагодзьдзе супрацьстаяньня паміж сабой — 98 гадоў таму адбылася першая вядомая з пісьмовых крыніц сустрэча. Тады 22 жніўня 1926 году зборныя местаў сустрэліся ў фінале першага неафіцыйнага чэмпіянату Беларусі (БССР) ў Менску, і бабруйчане загналі аршанцам два кочы без адказу і сталі чэмпіёнамі.

Пра гульню зборных Воршы і Бабруйску ў неафіцыйным першынстве Беларусі нялаўна выйшла відэа.

У далейшым Бабруйск у чэмпіянатах краіны прадстаўлялі розныя каманды — «Спартак», Фабрыка ім. Халтурына, Дом афіцэраў, «Старт», «Дзяржынец», «Бярэзіна», «Мэбэльшчык», «Будаўнік», «Трактар», «Фандок». З большасьцю сустракаліся і аршанскія дружыны, у тым ліку «Старт».

Клюбы, якія цяпер прадстаўляюць Воршу і Бабруйск, былі заснаваныя значна пазьней — «Старт» у 1951-м, а «Белшына» ў 1976-м годзе. Аднак няглядзячы на свой больш малады век, «шыньнікі» дамагліся сур’ёзнейшых за аршанцаў посьпехаў на беларускай футбольнай арэне: яны двойчы станавіліся чэмпіёнамі БССР, двойчы бралі срэбраныя мэдалі, заваёўвалі Кубак БССР і Кубак сэзону, а вось «швейнікі» ў першынстве дабіраліся толькі да 4-га месца і аднойчы былі фіналістамі Кубку.

Зусім іншая сытуацыя была ў бэндзі, дзе Ворша і Бабруйск некалькі дзесяцігодзьдзяў задавалі тон і моду ва ўсёй Беларусі — там часьцей перамагалі якраз аршанцы. Але гэта, як той казаў, зусім іншая гісторыя.

Дзеля зручнасьці назву бабруйскай каманды ў пераліку футбольных паядынкаў пішам актуальную на год сустрэчы, а ў аршанцаў нязьменна «Старт». Кубкавы паядынак 1996 году, прагуляны аршанцамі ў сэрыі 11-мэтровых, улічваецца, як і заўсёды ў статыстыцы, за нічыю, бо такім вынік быў у асноўны час.

Балянс супрацьстаяньня «Старт» — «Белшына»: 23 сустрэчы, +3 =5 -15, 18-52

1977 Шыньнік — Старт — 3:0

1977 Старт — Шыньнік — 0:0

1979 Старт — Шыньнік — 1:1

1979 Шыньнік — Старт — 0:0

1983 Шыньнік — Старт — 3:0

1984 Старт — Шыньнік — 2:1

1984 Шыньнік — Старт — 1:2

1985 Старт — Шыньнік — 1:1

1985 Шыньнік — Старт — 7:4

1986 Старт — Шыньнік — 0:4

1986 Шыньнік — Старт — 3:1

1996 Старт — Белшына — 0:0

2005 Белшына — Старт — 3:0

2005 Старт — Белшына — 1:3

2017 Старт — Белшына — 0:1

2017 Белшына — Старт — 3:1

2018 Белшына — Старт — 2:1

2018 Старт — Белшына — 2:1

2019 Белшына — Старт — 5:0

2019 Старт — Белшына — 1:4

2021 Старт — Белшына — 0:1

2021 Белшына — Старт — 2:1

2021 Старт — Белшына — 0:3

ШТО? ДЗЕ? КАЛІ?

Сустрэча адбудзецца ў чацьвер, 1 жніўня. Яе прыме бабруйскі стадыён «Спартак». Пачатак, а 17-й гадзіне. Квіток для дарослых будзе каштаваць 4 рублі, для дзяцей 2 рублі, для дзяцей да 6 гадоў уваход задарма.