Тур 18. Старт (Ворша) — БАТЭ-ІІ (Барысаў) — 0:5

Нічога, зусім нічога не ўдалося зрабіць нашай камандзе ў паядынку з барысаўцамі. Ад пачатку і да канца становішча на полі пільнавалі гульцы гасьцей. Даўно так не здаралася, у якім стане бы ні была нашая дружына, каб блакітна-чорным не ўдалося стварыць ніякага галявога моманту. Спакойная і ў нечым зьдзеклівая перамога барысаўскага калектыву зь непрыстойным лікам. Прагулялі 2:7 у першым коле, а цяпер 0:5. Тузін галоў за два паядынкі з моладзьдзю БАТЭ.

— Тата, а чаму ўсе бацькі па суботах вясёлыя і радасныя, а ты такі маркотны?

— Напэўна, таму, дзеці, што тыя бацькі не заўзятары „Старту“.

Цяжка нешта дадаць. У каманды відавочна не стае сілаў, лаўка вельмі кароткая, каб рабіць істотныя зьмены і даваць вядзельным гульцам адпачыць. Навідавоку перамучаньне складу. 

Дарэчы, упершыню ў гісторыі клюбу ў „Старце“ трое гульцоў з афрыканскімі каранямі — Тайсір Адамчык, Абдулазіз Лавал, Эбука Нэджы. Пры гэтым першы беларус, другі тут так даўно, што таксама ўжо амаль беларус, а трэці яшчэ ім, падобна, стане.

Пятая параза запар. Зноў Мікалай Кітаёў правёў замену брамніка, якая й цяпер не пайшла на карысьць. Раман Краўчанка добра дзейнічае на рысе, але жудасна гуляе нагамі. Астатнія гульцы таксама пастаянна памыляліся ў простых перадачах. Ну, а ўжо ў хуткасьці барысаўцы пераўзыходзілі аршанцаў пастаянна. Крызіс нашай дружыны сыстэмны. Пакуль у гакейным „Лякаматыве“ дарагія набыткі ўзгадняюць з самым кіраўніком райвыканкаму, у ножным шпурляку гульцоў проста не хапае, каб зацыраваць дзіркі ў складзе. Даўно не было такой безнадзейнасьці, і на гэты момант не відаць разьвязаньня.

СТАРТ: Макараў (Краўчанка, 46), Лавал, Адамчык, Жэстараў, Расолька (к) (Каранкоў, 72), Тамэла, Гоманаў (Беразун, 46), Воўчанка, Нікіпаронак (Нэджы, 80), Адыгелзадэ (Бабчанок, 20), Пунінскі.