Старт (Ворша) — Смаргоні — 1:1

 Нічыя дома з суседам у табліцы. Сярэдні вынік, але прымальны на тле чэрвеньскіх.

Ужо на 4-й хвіліне Валадзькоў адбіў два запар небясьпечныя стрэлы смаргоньцаў. А на 6-й хвіліне траўму атрымаў старажыл клюбу Іван Беразун, яго вымушана замянілі. У гасьцей было шмат размоваў пра Барыса Фартуну, злучнага, які прыехаў з расейскай ФНЛ. Ён сапраўды паказаў якасную гульню.

Гол у складзе аршанцаў загнаў на 22-й хвіліне Мікіта Вехцеў пасьля перадачы Глеба Жалезьнікава. Але ўжо праз 8 хвілінаў стартаўцы здалі сваю браму на карным боцы. У другой палове аршанцы аддалі шпурляк гасьцям, а самыя дзейнічалі закідамі і контраатакамі.

Трывогу выклікае тое, што наша дружына амаль выключна атакуе левым краем. Зразумела, там ёсьць ня толькі Жалезьнікаў, але і часта актыўны ў падлучэньнях да атакі Шалычаў. Але правы край Суздальцаву трэба ажыўляць — атакі празь яго залішне павольныя і часта завяршаюцца нічым. Больш за тое, гэта дазваляе спадужнікам перабудоўваць гульню пад свой правы край абароны і больш плённа там разбураць нашыя атакі. Напэўна, з тае прычыны Жалезьнікава пасьля заменаў у другой палове часова адпраўлялі якраз направа.

Шалычаў у гульні быў досыць учэпістым у абароне, але адсотак дакладнасьці перадач у яго быў нізкім. У канцы сустрэчы хутчэй смаргоньцы маглі выйсьці наперад, хоць сапраўдных момантаў агадаць наш браму яны мелі вобмаль.

СТАРТ: Валадзькоў, Тарбякоў, Бабчанок, Беразун (Воўчанка, 10), Пашкевіч (Дамброўскі, 90+2), Вехцеў (Кулеш, 69), Кудзінаў (Ціхаміраў, 69), Жалезьнікаў (к), Шалычаў, Рудзянок, Бардукоў.

ЛІЧБЫ

Набліжаецца роўнік першынства, а „Старт“ пакуль усе чатыры перамогі заваяваў на выправе. Дома каманда пакуль упарта не перамагае. Апошняй хатняй перамогай была вікторыя над пінскай „Хваляй“ 3:2 летась 9 лістапада. Такім чынам, ужо 8 месяцаў аршанская публіка ня бачыла, каб родная каманда набрала тры пункты на сваім стадыёне.

Іван Беразун правёў свой 135-ы паядынак за „Старт“. Ён зраўнаўся з нападнікам клюбу канца 90-х — пач. 00-х Дзьмітрыем Рыбаковым. Яны займаюць 19-е месца ў пераліку за ўсю гісторыю.

Мікіта Воўчанка запісаў на свой рахунак 122-і паядынак. Ён дагнаў паўабаронцу 1970-х Васіля Коскіна. Цяпер яны дзеляць 24-е месца ў сьпісе старажылаў.

Аршанцы і смаргоньцы згулялі ўнічыю 1:1 у трэці раз у гісторыі, папярэднія разы гэтакі лік быў у 2015-м і 2022-м гг.