СКА-1938 (Менск) — Старт (Ворша). Прадмова

ПЕРАД СУСТРЭЧАЙ

За дзевяць тураў да канца першынства менскія „армейцы“ яшчэ змагаюцца за выхад у Вышнюю лігу. У папярэднім туры СКА-1938 быў гарой у сустрэчы ў Пінску супраць „Хвалі“ — 3:1. Аршанцы прагулялі супару менчукоў у заводках за падвышэньне — „Слуцку“ — 0:3.

У сустрэчы першага кола аршанцы „праселі“ за 15 хвілін да канца, і ў выніку атрымалі два галы ад Мірона Карыцькі. Ягоны першы трапны стрэл стаў для СКА 50-м у гульнях з аршанцамі. Цяпер ён з 17 галамі разам з Ільлём Сенем з „Салігорску“ ўзначальвае выперадкі стральцоў. Тая параза 0:2 была сьведчаньнем розьніцы ў клясе камандаў. Гэта пацьвердзілі далейшыя падзеі першынства.

Цяпер стартаўцам трэба правесьці вельмі моцны паядынак, каб забраць пункты ў каманды, якая разьлічвае на выхад на наймацнейшы ровень. СКА адстае ад 1-а месца, дзе стаіць доўбізьнянская „Ніва“, на 4 пункты, таму яму пагатоў патрэбная перамога.

У аршанцаў праз адлучэньне будзе адсутнічаць асноўны цэнтральны абаронца Мікіта Быкаў, якога выдалілі ў папярэднім туры. Зрэшты, ягоны дублёр Мікіта Воўчанка часта выходзіць на замену і мае пастаянную практыку. Дый не было бачна, каб роўнем гульні адзін Мікіта істотна адрозьніваўся ад другога. Супраць вельмі выніковых армейскіх форвардаў у кожным разе было б няпроста.

БАЧЫНА ЛЕТАПІСУ

45 гадоў таму (1981) стартаўцы езьдзілі на выправу ў Берасьце, дзе згулялі ўнічыю 2:2 з „Пэдынстытутам“. Тая гульня была апошняй у першым коне першынства і нічога не вырашала — „пэдагогі“ ўжо ведалі, што трапяць у другі кон з 4-а месца, а аршанцы датэрмінова разьвіталіся з шанцамі пазмагацца за мэдалі.

Гэтак скончыўся 1-ы кон у сэзоне-1986 першынства БССР

ЯК БЫЛО?

У прадмове да сустрэчы першага кола мы ўжо пісалі пра нацяжкі і неадпаведнасьці з гісторыі СКА-1938, якія зьмяшчае клюбная старонка ў Сеціве. Часта „армейска-міліцэйскія“ клюбы вельмі залежалі ад пастаянных фармаваньняў-расфармаваньняў з боку ўладаў. Зьмяняліся акругі, гарнізоны, што не прыносіла стабільнасьці. Затое стабільна біла крыніца маладых шпурляроў прызыўнога веку. З клюбам зьвязаныя й лёсы некалькіх знаных аршанскіх гульцоў. Сярод іншых, гэта Манькоўскі, Бірукоў, Леановіч, Шынкевіч.

СКА 8 разоў (больш за ўсіх) станавіўся чэмпіёнам БССР (1934, 1935, 1940, 1946, 1950, 1952, 1964, 1965). Пра гісторыю клюбу ў 2021 годзе выйшла кніга „СКА Минск: на срочной службе у футбола“, дзе пра летапіс менскіх армейцаў можна прачытаць падрабязьней.

Падрахунак процістаяньня стартаўцаў Воршы з армейцамі Менску: 27 сустрэчаў, +5=4-18, 20-51

1964 СКА* — Старт — 5:1

1973 СКА — Старт — 1:0

1973 Старт — СКА — 0:2

2008 Зорка-БДУ — Старт — 3:0

2008 Старт — Зорка-БДУ — 1:2

2009 Старт — Зорка-БДУ — 0:2

2009 Зорка-БДУ — Старт — 2:0

2010 Зорка-БДУ — Старт — 4:0

2010 Старт — Зорка-БДУ — 2:4

2011 Старт — Зорка-БДУ — 1:2

2011 Зорка-БДУ — Старт — 0:2

2012 Зорка-БДУ — Старт — 3:0

2012 Старт — Зорка-БДУ — 0:1

2013 Зорка-БДУ — Старт — 2:0

2013 Старт — Зорка-БДУ — 1:0

2015 Старт — Зорка-БДУ — 3:0

2015 Зорка-БДУ — Старт — 1:0

2016 Старт — Зорка-БДУ — 0:0

2016 Зорка-БДУ — Старт — 0:3

2017 Энэргетык-БДУ — Старт — 1:1

2017 Старт — Энэргетык-БДУ — 1:0

2018 Энэргетык-БДУ — Старт — 4:0

2018 Старт — Энэргетык-БДУ — 0:1

2020 Старт — Энэргетык-БДУ — 1:6

2024 Старт — Энэргетык-БДУ — 2:2

2024 Энэргетык-БДУ — Старт — 1:1

2026 Старт — СКА-1938 — 0:2

*пазначаная назва супара на час правядзеньня сустрэчы. У аршанцаў — заўсёды „Старт“

ШТО? ДЗЕ? КАЛІ?

Гульня адбудзецца на РЦАП-Стайкі, як цяпер называецца даўно вядомая аршанцам менская арэна на вуліцы Сямашкі. Тут варта пасьмяяцца, згадаўшы размову прадстаўніка СКА з журналістамі і ягоныя словы, што стадыён месьціцца ў цэнтры Менску. І гэта сказаў чалавек, які пражыў у Менску шмат гадоў. Вядома ж, стадыён далёка ад цэнтру, у раёне Пятроўшчына. Сустрэча адбудзецца ў суботу, 26 верасьня. Пачатак а 15-й гадзіне.